domingo, 17 de julho de 2011

Galeria de imagens do concerto dos Dios ke te Crew


Acrescentamos mais um documento gráfico do Festival que decorreu neste fim de semana no Moinho de Pedroso. Desta vez, disponibilizamos as fotos da atuaçom musical dos Dios ke te Crew.

XI Festival da Terra e da Língua incluiu debate sobre meios alternativos e populares na sessom da tarde do sábado


Já temos as fotos do debate protagonizado por companheiros e companheiras do Diário Liberdade, Novas da Galiza, Galiza Contrainfo e Rádio Filispim.

Apresentados polo companheiro Alexandre Carrodéguas, que denunciou o papel dos grandes media do sistema, cada interveniente apresentou as caraterísticas do seu meio e analisou o panorama mediático galego atual, caraterizado polo férreo controlo informativo por parte do poder, a espanholizaçom forçada e generalizada, e as enormes dificuldades para que iniciativas populares alternativas podam ocupar um espaço próprio.

sábado, 16 de julho de 2011

O concerto dos Eina, ontem no Festival da Terra e da Língua, em fotos


Já temos a primeira galeria da primeira jornada do Festival. É a correspondente à atuaçom dos cataláns Eina e esperamos que gostedes.

sexta-feira, 15 de julho de 2011

Todo pronto para começar, nesta tarde, o XI Festival da Terra e da Língua



Nesta mesma tarde começa o Festival, umha vez que já concluiu a instalaçom das carpas, toldos e restante infraestrutura.

As primeiras tendas de campismo estám a instalar-se. A tarde está ensolarada e vale a pena chegar ao Moinho de Pedroso para desfutar do dia e, a partir das 22 horas, da música ao vivo.

Lembramos que hoje teremos concerto com Nhió, Residuos atractivas, Sacha na Horta e os cataláns Eina (ex-inadaptats).

Jóqui e Monse, da comissom organizadora do Festival, fôrom entrevistados na Rádio Filispim

O programa 'Divertimento para pequenos monstros', da Rádio Filispim, convidou-nos para darmos a conhecer o programa do Festival da Terra e da Língua. O condutor do programa, André, entrevistou Jóqui e Monse, da Junta Diretiva e da Comissom Organizativa da ediçom XI do Festival.

A Rádio Filispim é um dos meios alternativos que vam participar no debate do sábado no nosso Festival, junto ao jornal Novas da Galiza, o portal Diário Liberdade e Galiza Contrainfo.

Natalia Valinho, do Diário de Ferrol, entrevistou-nos para dar a conhecer o Festival

Reproduzimos a entrevista publicada ontem no Diario de Ferrol com o companheiro Bruno Lopes Teixeiro, da comissom organizadora do XI Festival da Terra e da Língua.

O aspecto reivindicativo é o ingrediente que diferencia o Festival da Terra e da Lingua doutras festas estivais da comarca. Un matiz que non perde nesta undécima edición que arrincará mañá no Muiño de Pedroso, en Narón, e no que os seus organizadores pretenden denunciar o papel dos grandes medios de comunicación ao servizo do capital e do poder. “Un dos inimigos dos movementos sociais e da liberdade de expresión é o imperio mediático. Os grandes medios de comunicación se caracterizan por manter unha liña editorial dictada polo grande capital e no noso caso tamén pola imposición lingüística”, indica Bruno Lópes membro da Fundación Artabria organizadora do festival, quen recorda que actualmente tan só un xornal en Galicia escríbese en galego, Novas da Galiza, e que precisamente este convidado a esta edición.

Un tema que será abordado na mesa de debate programada para este sábado a partires das 19.30 horas e no que intervirán profesionais do Diário Liberdade, Galizacontrainfo, Rádio Filispim ademáis do mencionado Novas da Galiza. Xa dende mañá a música será outra das grandes protagonistas deste festival que nesta edición traerá a Pedroso a música punk-rock de Nhió!, Sacha na Horta, Residuos Atractivas e Eina.
“Normalmente o principal criterio na elección dos grupos e que sexan galegos e canten na nosa lingua; e a poder ser os que veñan de fóra de Galicia que canten na súa lingua materna. No caso desta edición o único grupo que vén de fóra son os Eina de Vilafranca do Penedês que antes eran os Inadaptados e que teñen unha traxectoria de máis de doce anos de música comprometida e reivindicativa, cun claro contido antifascista, independentista catalán e feminista”, indica .

Participación

Un dos obxectivos desta edición é acadar, senón superar, as cotas de participación de anos pasados. “No 2010 con Lamatumbá estiveron en Pedroso un millar de persoas e o obxectivo será volver a congregalas”, sinalou Bruno Lópes. “O feito de que Narón non teña este ano festas patronais por mor da crise, fan do Festival da Terra e da Lingua e do Oenach Atlántico os pratos fortes das festas no municipio o que pode contribuír a que este ano veña máis xente”, vaticinou.

A crise tampouco permaneceu allea ao Festival da Terra e da Lingua que este ano contou cun orzamento inferior a outras edicións. “No 80% o festival está financiado polo traballo autoxestionado da Fundación Artabria, co que se vende no balcón do festival, venda de rifas ou o material editado. Ademáis o Concello da una subvención que este ano viuse reducida á metade, 3.000 euros, e logo o sindicato CIG si fai una aportación importante”, indicou. A eles agradece a súa plena disposición para colaborar con Artabria todos estes anos. Asi mesmo a Fundación solicita publicidade ao pequeño comercio de Narón e Ferrol no que tamén se viron afectados no número de anunciantes “ben porque moitos comercios pecharon ou non están neste ano na disponibilidade económica de facer a aportación que outros anos fixeron”, salienta.

Trabas aparte, a undécima edición do Festival da Terra e da Lingua arrinca mañá en Pedroso nunha xornada que terá na música a súa protagonista. Xa o sábado as actividades darán comezo cara o mediodía cunha exposición fotográfica pero tamén haberá campionatos de fútbol e billarda, recitais poéticos e debate. O pregón correrá este ano a cargo do xornalista de Diario de Ferrol, Nicolás Vidal, que contará coa colaboración do músico ferrolá Roger de Flor e o Marqués das Vinhas. Para botar o peche a este evento máis música da man dos grupos Arenga, Die Tsunami, Chotokoeu e Dios ke te Crew.

quinta-feira, 14 de julho de 2011

Começam os preparativos para o Festival no Moinho de Pedroso











Na verdade, o trabalho prévio para o Festival começou há alguns meses, mas ontem começou a instalaçom sobre o terreio de todo o necessário para que esta sexta-feira, dia 15, poda iniciar-se o XI Festival da Terra e da Língua no Moinho de Pedroso, em Narom (Terra de Trasancos).

O trabalho voluntário da massa social apoiante da Fundaçom Artábria fai possível, mais umha vez, que todo esteja pronto para receber as e os visitantes nesta nova ediçom do Festival, no que é a atividade mais importante do Verao da Artábria.

Hoje continuam os trabalhos prévios e amanhá faltará só o mais importante: o apoio do público, sem o qual nada do resto teria sentido. Contamos contigo para assegurar um fim de semana de festa e reivindicaçom por umha Galiza em galego e por uns meios informativos ao serviço do povo e nom do capital.

Esperamos-te no Moinho de Pedroso!