Ao meio-dia de hoje, o companheiro Vítor Santalha e a companheira Monse Dias, junto à vereadora de Desportos e Juventude da Cámara de Narom, Natália Ermida, apresentárom a XI ediçom do Festival da Terra e da Língua aos meios de comunicaçom da comarca.
A sala de imprensa da Cámara Municipal de Narom acolheu a apresentaçom pública do programa do Festival deste ano, que contrariamente a anos anteriores, nom vai coincidir com as festas municipais, já que estas fôrom suspensas polo governo municipal naronês devido à crise económica em curso.
Essa circunstáncia foi apontada por Natália Ermida, vereadora e representante da Cámara Municipal de Narom no evento deste meio-dia, convidando a vizinhança do concelho a assistir a um festival que considerou "consolidado" após 10 ediçons e a décima primeira que hoje se apresentava aos meios e que se desenvolverá nos dias 15 e 16 deste mês de julho.
Por parte da Artábria, o companheiro Vítor Santalha agradeceu a colaboraçom da Cámara de Narom, constante desde o primeiro ano e importante para garantir um espaço privilegiado como o Moinho de Pedroso e serviços básicos para o bom funcionamento dos atos que cada ano dam conteúdo ao programa. Vitor agradeceu também a participaçom da massa social e círculos amigos da Fundaçom Artábria, que de maneira muito diversa colaboram cada ano para que o Festival seja possível.
Por último, a companheira Monse Dias explicou o conteúdo do programa deste ano, que inclui, entre outras atividades, um Festivalzinho para crianças, umha exposiçom fotográfica organizada por Galiza Contrainfo, um debate com representantes do Dário Liberdade, Novas da Galiza, Galiza Contrainfo e Rádio Filispim (sobre meios alternativos), poesia musicada, desporto e música, com os grupos Arenga, Die Tsunami, Chotokeu e Dios Ke Te Crew.
